Um Brúðarslör.is


Brúðarslör.is

Brúðarslör.is hóf starfsemi í janúar árið 2001, þá byrjaði ég að sauma brúðarslör og selja í Brúðarkjólaleigu Dóru. Smátt og smátt vatt þetta uppá sig og ég er núna að sauma brúðarslör fyrir helstu brúðarkjólaleigur í Reykjavík, þ.e. Brúðarkjólaleigu Katrínar, TvöHjörtu og verslunina Prinsessuna í Mjódd.

Fljótlega fór ég einnig að sauma hringapúða og bjóða uppá sérmerkingu þeirra. Til eru margar gerðir og reyni ég einnig að koma til móts við óskir brúðhjónanna.

Sérpantanir eru mitt uppáhald, það að reyna að koma á móts við þarfir brúðarinnar og sauma draumaslörið.
Allt efni í brúðarslörin er sérpantað frá Bandaríkjunum og er ég í góðu samstarfi við efnisverslun í Chicago sem kemur til móts við það sem ég bið um.

Hver er Ella Jóna

 

Ég heiti fullu nafni Elín Jóna Traustadóttir og er fædd árið 1971og uppalin í Unnarholti í Hrunamannahreppi.
Núna bý ég í Tungufelli í Hrunamannahreppi sem er efsti bærinn í sveitinni. Ég á þrjú börn Maríönnu fædda 1995, Einar Trausta fæddan 1998 og Elínu Helgu fædda 2011. Maðurinn minn heitir Svanur Einarsson og er hann frá Tungufelli og erum við ógift. Við stundum búskap með kýr, kindur og hesta.

Árið 1989-90 fór ég sem skiptinemi til Bandaríkjanna.
Árið 1992 útskrifaðist ég sem stúdent frá Menntaskólanum að Laugarvatni. Árið 1994 útskrifaðist ég sem íþróttakennari frá ÍKÍ.
Ég hef verið íþróttakennari og nú síðustu ár Upplýsingamenntar kennari síðan árið 1997.
Haustið 2004 byrjaði ég í Framhaldsdeild KHÍ í Upplýsinga- og tæknimennt og lauk því námi haustið 2006. Síðan hef ég verið að kenna Upplýsinga- og tæknimennt í Flúðaskóla, ásamt því að sinna kerfisstjórn. Haustið 2008 hóf ég störf hjá Tölvu og rafeindaþjónustu Suðurlands.

Ég hef lengi haft áhuga á saumaskap og hef frá barnsæsku saumað nánast öll mín spariföt sjálf. Upphaf þess að ég fór að sauma brúðarslör var að ég eignaðist bók um hvernig ætti að sauma brúðarkjóla og samkvæmiskjóla. Ég sá aftast í bókinni að þar var einnig sagt frá því hvernig ætti að sauma brúðarslör og datt í hug að þarna væri eitthvað sem ég gæti gert þar sem þetta væri örugglega ekki saumað hér á Íslandi. Ég vatt mér í að panta efni að utan og saumaði tvö slör til prufu og sendi síðan tölvupóst til allra brúðarkjólaleiga á höfuðborgarsvæðinu. Ein svaraði mér en það var hún Sólveig sem átti þá Brúðarkjólaleigu Dóru. Henni leyst mjög vel á og þá fór boltinn að rúlla. Ég á Sólveigu miklar þakkir fyrir að hvetja mig áfram.
Haustið 2005 festum ég og móðir mín Elín Guðfinnsdóttir kaup á nýrri Designer 1 saumavél og tók þá móðir mín (kölluð Ellý) við að sauma hringapúðana.

Ég vil meina að notkun brúðarslöra hafi aukist við það að þau eru nú íslensk framleiðsla og ég vona að sú aukning haldi áfram.

Ella Jóna